Me afrimin e dimrit, shumë familje po e ndezin më shpesh ngrohjen. Në muajt e ftohtë, tharja e rrobave bëhet më e vështirë.

Për këtë arsye, shumë njerëz vendosin rrobat e lagura direkt mbi radiator për t’i tharë. Por ky zakon shfaq disa probleme. Jo vetëm që rrit rrezikun e mykut në shtëpi, por mund të shkaktojë edhe probleme me frymëmarrjen.

Sipas ekspertëve të Plumbworld, kur rrobat nxehen, lagështia që avullon rrit nivelin e lagështisë në shtëpi dhe krijon kondensim. Kjo e rrit rrezikun e mykut, sidomos në dhoma të vogla ose me ajrosje të dobët.

Lagështia e lartë mund të përkeqësojë alergjitë, dhe për ata që vuajnë nga astma ose probleme të tjera të frymëmarrjes, rreziku është edhe më i madh. Fëmijët dhe të moshuarit preken më lehtë nga këto ndryshime.

Përveç se e bën shtëpinë të ndjehet më e rënduar dhe e lagësht, tharja e rrobave mbi radiator është edhe më e kushtueshme. Rrobat e lagura bllokojnë nxehtësinë, duke e detyruar ngrohjen qendrore të punojë më shumë për të ngrohur dhomën — dhe kjo rrit faturat.

Ekspertët këshillojnë të përdoret një varëse rrobash e vendosur afër radiatorit, por jo mbi të. Po ashtu, rekomandohet të hapen dritaret rreth 10 minuta në ditë për të larguar lagështinë e tepërt.

Përdorimi i një avullthithësi (dehumidifier) në dhomën ku thahen rrobat është gjithashtu një ide shumë e mirë.

“Tharja e rrobave mbi radiator mund të duket e përshtatshme, por lagështia e tepërt dhe ulja e efikasitetit të ngrohjes e bëjnë këtë zakon të dëmshëm. Me disa ndryshime të thjeshta, njerëzit mund të mbrojnë shtëpinë, shëndetin dhe sistemin e ngrohjes”, shtuan ekspertët.